Изҳори миннатдории соҳибкорони бозори марказии Кӯлоб

Ба Вазири корҳои дохилии       

Ҷумҳурии Тоҷикистон               

генерал-лейтенанти милитсия

Раҳимзода Р.Ҳ.                           

 Мўҳтарам Рамазон Ҳамро!

Чуноне, ки иттилоъ доред, шаби 22 июли соли 2014, тахминан соатҳои 00.40 дақиқа дар бозори марказии шаҳри Кӯлоб сӯхтор рух дод. Оташ дар як лаҳза чанд дукону нуқтаҳои савдоро ба коми худ фурӯ бурда, хавфи бевоситаи паҳн гардидани оташ ба дигар нуқтаҳои савдоро дошт.

Лаҳзае нагузашта, кормандони Шӯъбаи хадамоти давлатии оташнишонӣ дар минтақаи Кӯлоб, Қисми мустақили 33 ҲХДО дар шаҳри Кӯлоб, роҳбарият ва ҳайати шахсии Қисми минтақавии РВКД вилояти Хатлон оид ба гурӯҳи ноҳияҳои Кӯлоб, ШВКД дар шаҳри Кӯлоб, Дастаи таъиноти махсуси милитсияи ВКД Ҷумҳурии Тоҷикистон ва қисми ҳарбии 5403-и Қӯшунҳои дохилии ВКД ҶТ ба маҳалли ҳодиса расида, ташаббусро ба даст гирифтанд. Онҳо бо малакаю маҳорати баланди касбии худ нагузоштанд, ки ба дигар дӯкону нуқтаҳои савдо оташ доман паҳн карда, ба тоҷирону соҳибкорон хисороти зиёдтар расонад.

Мӯҳтарам Вазир, аз ин лиҳоз, мо як гурӯҳ тоҷирону соҳибкорони бозори марказии шаҳри Кӯлоб ба Шумо ва дар шахсияти Шумо ба кулли кормандони мақомоти корҳои дохилии шаҳру минтақаи Кӯлоб барои нишон додани ҷасорат, малакаю маҳорати касбӣ ва арзанда будан ба вазифаҳои хизматии ишғолкардаашон изҳори миннатдорӣ намуда, бароятон дар оянда дар иҷрои вазифаҳои басо душвору пурифтихоратон муваффақиятҳои навро таманно дорем.

Бо эҳтиром, як гурӯҳ тоҷирону соҳибкорони бозори марказии шаҳри Кӯлоб: