Таҷлили ҷашни Истиқлоли давлатӣ дар РВКД вилояти Хатлон

Бигзор, нури хуршеди истиқлолият то абад равшангари ҳаёти ҷомеаи мо гардад!
Эмомалӣ Раҳмон

Истиқлол дастоварди муҳимтарин, бузургу бебаҳо ва таърихии миллати мо ва ормони чандинасраи фарзандони асилу огоҳ ва маҳсули талошҳои садҳо ҳазор муборизони роҳи бақои давлати тоҷикон мебошад.
6-уми сентябри соли 2023 дар толори маҷлисгоҳи Раёсати ВКД дар вилояти Хатлон, бахшида ба 32-юмин солгарди Истиқлоли давлатии Ҷумҳурии Тоҷикистон ҷамъомади тантанавӣ бо иштироки ҳайати шахсӣ, шоирон, собиқадорон ва ҷавонони фаъол доир гардид.
Чорабинӣ бо садо додани Суруди миллии Ҷумҳурии Тоҷикистон оғоз гардида, сардори Раёсати мазкур, полковники милитсия Нозимзода Файзулло Ватан ҳозирин ва дар симои онҳо кулли мардуми сарбаланди Тоҷикистонро ба ифтихори ин санаи муқаддаси миллӣ муборакбод намуд.
Қайд карда шуд, ки Истиқлол ин ифтихор аз соҳибдавлатӣ ва ватандории миллати сарбаланди бофарҳанги тоҷик мебошад, ки 32-сол боз тақдирашро ба дасти худ гирифта, ба ҷомеаи муттамадини ҷаҳонӣ бо роҳу равиш ва симои хоса пайваста аст. Инчунин оид ба дастовардҳо ва заҳматҳои шабонарӯзии Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон маълумот манзур намуда, иброз дошт, ки аз рӯзҳои нахустини соҳибистиқлолӣ Пешвои миллат, баҳри наҷот додани миллати тоҷик аз вартаи нестшавӣ кушишу заҳматҳо ба харҷ дода, Тоҷикистонро ба кишвари пешрафта табдил дод.
Ҳамзамон дар чорабинӣ шоир Амиршои Хатлонӣ дар васфи ватану ватандорӣ ва истиқлолу ваҳдати сартосарӣ шеърҳои пурмазмун қироат намуда, қайд кард, ки Истиқлол неъмати бебаҳо ва нодире ҳаст, ки бо заҳмату талош ва кӯшишу ҷоннисориҳои мардуми саодатманд ва сарбаланди кишварии азизамон бо Сарварии Пешвои муаззами миллат муҳтарам Эмомалӣ Раҳмон ба даст омадааст. Муҳимтар аз ҳама боиси ифтихору сарфарозист, ки сокинони кишвар имрӯз дар фазои дӯстиву рафоқат ва суботу оромӣ ҳаёт ба сар бурда, дар пешрафту шукуфоӣ ва ободии Ватан саҳми арзанда мегузоранд.
Сипас филми «Дастовардҳо» аз корнамоиҳои Президенти кишвар Эмомалӣ Рахмон ва кормандони мақомоти корҳои дохилӣ ва ободкориву созандагӣ дар давоми 32-соли Истиқлоли давлатӣ ба иштирокдорони чорабинӣ намоиш дода шуд.
Дар фарҷоми чорабинии тантанавӣ, барои зоҳир намудани маҳорату малакаи баланди касбӣ, босифат иҷро намудани вазифаҳои хизматӣ ва ба муносибати ҷашни 32-солагии Истиқлоли давлатии Ҷумҳурии Тоҷикистон бо Фармони Вазири корҳои дохилии Ҷумҳурии Тоҷикистон генерал-полковники милитсия Раҳимзода Рамазон Ҳамро як қатор ҳайати қаторӣ ва роҳбарикунандаи мақомоти корҳои дохилӣ бо рутбаҳои навбатӣ, медалҳои ҷашнӣ, Раҳматнома ва Ифтихорномаҳо дар вазъияти тантанавӣ сарфароз гардонида шуданд.
Офоқ Қодириён, полковники милитсия