Маълумот оид ба беному нишон гум шудани шаҳрванди Ҷумҳурии Мардумии Чин Женг Хуанг

22-юми июли соли 2023, аризаи шаҳрванд Қосимов Донияр Замирович, соли таваллудаш 1978, зода ва истиқоматкунандаи ноҳияи Мурғоб, ҷамоати деҳоти Мурғоб, кӯчаи Бердибеков, хонаи 2, ронандаи ширкати сайёҳии Ҷумҳурии Қирғизистон «Визит Алай», оиладор, соҳиби 5 фарзанд, пеш суд нашудааст, оид ба ғайб задани мусофираш шаҳрванди Ҷумҳурии Мардумии Чин Женг Хуанг (ZHEG XUAG), соли таваллудаш 11 октябри соли 1981, истиқоматкунандаи Штатҳои Муттаҳидаи Амрико, ки санаи 19 июли соли 2023-юм ба самти деҳаи Хиҷези ҷамоати деҳоти Рушони ноҳияи Рушон рафта, бедарак гум шудааст, ворид гардид.

Бо мақсади муайян ва дарёфт намудани гумшуда шаҳрванди Ҷумҳурии Мардумии Чин Женг Хуанг гурӯҳи оперативӣ-тафтишотии Шуъбаи ВКД дар ноҳияи Рушон фавран ба ҷойи ҳодиса ҳозир шуда, бо қувваҳои ёрирасон ва аҳли ҷамоатчигӣ ба ҷустуҷӯи номбурда шурӯъ намуданд.
Ҳамзамон дар ҳамкорӣ бо Раёсати ҳолатҳои фавқулода ва мудофиаи гражданӣ дар ВМКБ ва Комендатураи сарҳадии Қӯшунҳои сарҳадии КДАМ Ҷумҳурии Тоҷикистон дар ноҳияи Рушон соҳили дарёҳои «Бартанг» ва «Панҷ» азназар гузаронида шудаанд.
Инчунин, бо мақсади дарёфти номбурда ҳамаи шикорчиён, даҳмардагон ва сокинони деҳаҳои гирду атрофи ҷойи ҳодиса барои дарёфт намудани сайёҳи дар боло зикргардида сафарбар гардидаанд.
Оид ба ҳодисаи беному нишон гум шудани шаҳрванди Ҷумҳурии Мардумии Чин Женг Хуанг парвандаи ҷустуҷӯӣ аз 24-уми июли соли 2023 оғоз гардида, зери назорат қарор дорад.
Бинобар ин, оид ба дарёфт намудани сайёҳи гумшуда шаҳрванди Ҷумҳурии Мардумии Чин Женг Хуанг чорабиниҳои оперативӣ-ҷустуҷӯӣ идома доранд.