ДАР ҶАВОНӢ САЪЙ КУН ГАР БЕХАЛАЛ ХОҲӢ АМАЛ!

«Ҷавонон пайрави Пешвои миллат», таҳти чунин унвон дар Раёсати мубориза зидди ҷиноятҳои муташаккили ВКД бо иштироки ҷавонони фаъол ҳамоиш баргузор гардид. Дар он роҳбарияти раёсат ва намояндагони Кумитаи кор бо ҷавонон ва варзиши назди Ҳукумати Ҷумҳурии Тоҷикистон, кормандони касбу кори гуногун суханронӣ намуданд.
Чорабиниро сардори РМЗҶМ ВКД генерал-майори милитсия Ҳафиззода Шодӣ Хуршед оғоз намуда, доир ба нақши ҷавонон дар пешрафти кишвар ва саҳмгузории онҳо дар рушду нумӯъ ва муаррифии давлат дар арсаи байналмилалӣ ибрози андеша кард.
Мавсуф илова намуд, ки: «Агар ба таърихи давлатдории тоҷикон назар афканем, мушоҳида мекунем, ки дар тӯли таърих мардуми мо чӣ қадар азобу машаққат кашидаанд. Баъди ба сари қудрат омадани фарзанди фарзонаи миллати тоҷик Пешвои миллат муҳтарам Эмомалӣ Раҳмон давлати тоҷикон дар миёни 200 давлати дунё шинохта шуд.
Ҷавонони мо бо дастгирию ғамхориҳои Роҳбари давлат дубора бедордилу соҳибмаърифат гардида, дар пешбурди соҳаҳои гуногун саҳми арзандаи хешро мегузоранд. Имрӯзҳо бо дастгириву ғамхориҳои бевоситаи Пешвои миллат ба масъалаи таълиму тарбия ва ташаккули ҷавонон диққати махсус зоҳир гардида, имконият фароҳам оварда шудааст, ки онҳо дар беҳтарин муассисаҳои таълимии мамлакат ва хориҷ аз он таҳсил кунанд, таҷриба омӯзанд ва соҳиби касбу ҳунарҳои замонавӣ гарданд».
Номбурда, ҳамчунин гуфт, ки ҷавонон бояд аз имконоту дастгирии Сарвари давлат хуб истифода намояд, то ин ки дар оянда барои Ватан хизмати босазо карда тавонанд. Айни замон тибқи маълумоти оморӣ, шумораи ҷавонони то 35-сола дар байни хизматчиёни давлатӣ ҳудуди 50 фоизро ташкил дода, 23 фоизи онҳо дар ҳайати роҳбарикунанда фаъолият доранд.
Сардори раёсат бо ёдоварӣ аз нақши ҷавононе, ки барои таъмини амнияти кишвар ҷони хешро дар хатар гузоштаанд, иброз намуд, ки онҳо бо як ҷасорату далерӣ баҳри суботи кишвар ҷоннисориҳо намудаанд, ки корнамоиҳояшон барои насли имрӯз намунаи ибрат мебошад.
Дар фароварди суханрониаш Шодӣ Ҳафиззода ҷавонони кишварро бахшида ба рӯзи идашон самимона табрику таҳният гуфта, ба онҳо саломатии бардавом, сулҳу субот, некӣ ва шукуфоӣ таманно намуд.
Меҳмони вохӯрӣ, мудири бахши робитаҳои хориҷии Иттифоқи нависандагони Тоҷикистон Абдуллои Раҳнамо доир ба ҳисси миллӣ ва арҷ гузоштан ба муқаддасоти Ватан ибрози андеша намуд. Мавсуф, инчунин дар бораи тараққиёту пешрафти кишвар ва саҳми арзандаи Пешвои миллат дар пойдории давлати миллӣ андешаронӣ кард.
Дар идома илова намуд, ки: «Барои оне ки мо ватанамонро дӯст дорем, пеш аз ҳама бояд онро ҳимоя кунем, дуруст шиносем. Агар мо ин Ватан, обу хок, кӯҳу даштҳо ва чашмаву зебоиҳояшро надида бошем, мо чӣ гуна метавонем, ки онро дӯст дорем. Дӯстдории Ватан дар натиҷаи огоҳӣ аз таърих, фарҳанг ва гузаштаи имрӯз ва зебоии табиат ба як ҳисси ивазнашаванда табдил мешавад. Чунки бе донишу огоҳӣ ватандӯстӣ намешавад. Агар корнамоиҳои фарзандони фарзонаи ин миллатро надонем, мо чиро дӯст дошта метавонем? Сабаби дигари дониш ва аҳамияти таърих ин аст, ки агар мо бо дониш мусаллаҳ бошем, бо ҳамин таъриху фарҳанге, ки дорем, ҳеҷ гурӯҳи ифротӣ моро наметавонад ба сӯйи худ ҷалб созад ва аз роҳи ростамон берун кунад».
Сардори раёсати кор бо ҷавонони дастгоҳи марказии Кумитаи кор бо ҷавонон ва варзиш Амирҷон Иброҳимзода ба роҳбарияти Раёсати мубориза зидди ҷиноятҳои муташаккили ВКД барои баргузории чорабинии муҳим бахшида ба Рӯзи ҷавонон изҳори миннатдорӣ гуфта, сипас аз номи роҳбарияти кумитаи мазкур ҳамаи кормандони ҳифзи ҳуқуқро ба ин санаи таърихӣ муборакбод намуд.
Ҳамчунин, дар ин вохӯрӣ корманди ҷавони РМЗҶМ капитани милитсия Муродалии Зоҳирзода иброз дошт, ки: «Ман ҳамчун як ҷавони даврони истиқлол кӯшиш мекунам, ки дар амнияту сулҳу суботи кишвар саҳми арзишманди худро гузорам. Зеро аз он ифтихор мекунам, ки дар даврони сулҳу суботу оромӣ ба дунё омада, ба воя расидаем. Мо кӯшиш ба харҷ медиҳем, ки ҳамаи дастовард ва неъматҳое, ки барои мо муҳайёст, онҳоро чун гавҳараки чашм ҳифз намуда, боз ҳам барои пешрафту ободии кишвар саҳми арзандаи хешро гузорем».
Дар хотимаи чорабинӣ аз номи роҳбарияти ВКД, Кумитаи кор бо ҷавонон ва варзиш ва РМЗҶМ ба як қатор ҷавонон барои саҳми арзанда гузоштан дар таъмини тартиботи ҷамъиятӣ ва пешгирии ҷинояткорӣ  Ифтихорнома, Сипоснома, Раҳматнома ва дигар туҳфаҳои хотиравӣ тақдим гардид.
Раҷаббек ИЛЁСОВ,
Тоҷиддин ЛАТИПОВ