Қадршиносӣ ба муносибати рӯзи касбӣ

Рӯзи 2 июл ба муносибати рӯзи таъсисёбии хадамоти Бозрасии давлатии автомобилӣ дар толори Шуъбаи БДА Раёсати ВКД дар вилояти Суғд бо иштироки ҳайати шахсӣ ва собиқадорони соҳа ҷамъомади тантанавӣ ташкил карда шуд. Тавре аз таърих барои мо рӯшан аст ҳануз аз солҳои аввали пайдоиши Ҳокимияти Шӯравӣ Ҳукумат ба масъалаи таъмини бехатарии ҳаракат дар роҳ ғамхорӣ зоҳир намуда моҳи марти соли 1936 Бозрасии давлатии автомобилӣ ба тобеъияти Сарраёсати милитсияи коргару деҳқон гузаронида шуд ва 3 июли ҳамон сол Шӯрои Комиссариати халқии Иттиҳоди Шӯравӣ Низоменомаро «Дар бораи Бозрасии давлатии автомобилӣ» тасдиқ менамояд, ки аз ин баъд ҳамчун санаи таърихии таъсисёбии БДА шинохта шудааст.
Ҷамъомади тантанавӣ бо маърузаи табрикотии сардори Раёсати ВКД дар вилояти Суғд генерал-майори милитсия Навҷувонов Абдулло Шанбиевич оғоз гардид, ки аз номи Вазири корҳои дохилӣ генерал-полковники милитсия Раҳимзода Рамазон Ҳамро ҳозиринро шодбошу қадршиносӣ намуд. Мавсуф таъкид намуд, ки таҷрибаи амалии фаъолияти мақомоти корҳои дохилӣ собит кардааст, ки кормандони Бозрасии давлатии автомобилӣ дар таъмини бехатарии ҳаракат дар роҳ, хусусан пешгирии ҳодисаҳои роҳу нақлиётӣ, ба танзим даровардани ҳаракати воситаҳои нақлиёт ва пиёдагардон, бақайдгирии воситаҳои нақлиёт, додани шаҳодатномаи ронандагӣ ва дигар вазифаҳо саҳм дошта дар сохтори ВКД мақомоти ягонаест, ки идоракунии давлатиро дар соҳаи бехатарии ҳаракат дар роҳ амалӣ мегардонад.
Дар идомаи чорабинӣ сардори Шуъбаи бозрасии давлатии автомобилии Раёсати ВКД дар вилояти Суғд полковники милитсия Суҳроб Қурбонзода аз таърихи бозрасии давлатии автомобилӣ ёдовари намуда, оиди пайдоши аввалин аломат ва қоидаҳои ҳаракат дар роҳ, фаъолияти шабонарӯзӣ, саҳми бозрасон дар риоя ва таъмини тартибот дар роҳҳои нақлиётгарди вилоят ба ҳозирин маълумот дод. Ҳамчунин вобаста ба дастгириҳои доимии Ҳукумати Ҷумҳурии Тоҷикистон ва роҳбарияти Вазорати корҳои дохилӣ ҷиҳати таъминоти моддӣ-техникӣ, таъмин намудан бо нақлиёти хизматӣ то техналогияи муосири хизматиро зикр намуда, ба собиқадорони соҳа сипосмандӣ барои гузоштани асоси фаъолият, тарбияи кадрҳои ҷавон ташкили пояҳои бунёдии хадамоти Бозрасии давлатии автомобилиро баён дошт. Аз кормандони феълӣ даъват ба амал овард, ки бо масъулияти баланд ва интизоми намунавӣ фаъолияти худро пеш бурда анъанаҳои хизматиро риояву такмил диҳанд, то ин кӣ волоияти қонун таъмин ва барои оромию осудагии мардум хизмат карда бошанд.
Собиқадорони соҳа низ аз дирӯзу имрӯзи хадамоти Бозрасии давлатии автомобилӣ сухан карда саҳми онро дар ҳифзи саломатии аҳолӣ ва таъмини бехатарии иштирокчиёни ҳаракат дар роҳ муҳим арзёбӣ намуданд.Дар хотимаи ҷамъомади тантанавӣ бахшида ба Рӯзи касбии кормандони Бозрасии давлатии автомобилӣ бо фармоиши роҳбарияти Раёсати ВКД дар вилояти Суғд якчанд нафар кормандон барои нишон додани маҳорати баланди касбӣ баҳри таъмини бехатарии ҳаракат дар роҳ, ошкорсозии қоидавайронкуниҳои дағал, интизоми намунавӣ ва иҷрои вазифаҳои хизматӣ дар самти роҳу нақлиёт бо Сипоснома ва Ифтихорнома, ҳамчунин собиқадорони соҳа ва кормандони ғайриштатии дар самти БДА вобастагардида бо туҳфаву Сипоснома қадршиносӣ карда шуданд.
Акбар Шарифӣ, майори милитсия