Ғолиби навбатии Ҷоми ҷаҳонии бокс ба Ватан баргашт

Чи тавре қаблан хабар додем, аз 5-ум то 11-уми декабри соли равон дар минтақаи Белоярски Федератсияи Россия мусобиқаи варзишӣ барои дарёфти Ҷоми ҷаҳонии бокс миёни кишварҳои истеҳсолкунандаи нафт баргузор гардид. Дар мусобиқаи мазкур варзишгарон аз Озарбойҷон, Миср, Конго, Гурҷистон, Беларус, Тоҷикистон ва Узбекистон иштирок намуданд.
Рақобатҳо аз рӯи 13 вазн миёни мардон ва 6 вазн миёни занон ҷараён гирифт. Корманди Раёсати ВКД дар шаҳри Душанбе, лейтенанти милитсия Миҷгона Самадова дар вазни 57 кг сазовори медали тилло гардида, ба Ватан баргашт.
Варзишгари дигари тоҷик тирандози калони ДТММ ВКД лейтененти хурди милитсия Музаффарзода Меҳриноз Баҳрихон, ки иштирокчии ин чорабинии варзишӣ буд, дар вазни 81 кг бо нишон додани маҳорати баланди варзишӣ сазовори ҷойи 3-юм гардид.
17-уми декабр дар фурӯдгоҳи байналмилалии шаҳри Душанбе Музаффарзода Меҳринозро кормандони ДТММ ВКД, намояндагони Шӯрои ҷумҳуриявии «Динамо»-и ВКД, мураббиён ва наздикону пайвандонаш самимона пешвоз гирифтанд.
Қайд кардан зарур аст, ки дастаи мунтахаби Тоҷикистон оид ба бокс дар 5-ум Ҷоми ҷаҳон миёни кишварҳои истеҳсолкунандаи нафт сазовори 6 медал: 2 тилло, 1 нуқра ва 3 биринҷӣ гардиданд.