Хуҷанд: доир гардидани каратэ-до байни наврасон

Дар шаҳри Хуҷанд тибқи нақша-чорабинии Шӯрои ҷамъиятӣ оид ба мусоидати ҷомеаи шаҳрвандӣ ба ислоҳоти милитсия дар назди Раёсати Вазорати корҳои дохилии Ҷумҳурии Тоҷикистон дар вилояти Суғд бо дастгирии ҳамоҳангсози миллӣ ва Дафтари Созмони амният ва ҳамкории Аврупо дар Тоҷикистон 5 декабри соли 2021 мусобиқаи кушод оид ба каратэ - до байни кӯдакон, наврасон ва ҷавонон баргузор гардид.
Мусобиқа дар ҳамкорӣ бо Федератсияи "Каратэ-до"-и вилояти Суғд ва бахши кор бо ҷавонон, варзиш ва сайёҳии шаҳри Хуҷанд доир гардид. Мусобиқа дар Муассисаи таълимии мактаб барои хонандагони болаёқати шаҳри Хуҷанд гузаронида шуда, дар он варзишгарон дар ҳайати дастаҳо байни ҳам қувваозмоӣ намуданд.
Дар маросими ҷамъбастӣ раиси Шӯрои ҷамъиятӣ Маликисломӣ Наим Мунаввар иштирок ва суханронӣ намуд.
Таъкид гардид, ки мақсад аз баргузории мусобиқа ин тарғиби тарзи ҳаёти солим, ҷалби омма, алалхусу наврасону ҷавонон ва духтарон ба тарбияи ҷисмонӣ ва варзиш, мустаҳкам намудани дӯстии варзишгарон, баланд бардоштани маҳорат ва малака мебошад.
Дар охир ғолибон бо диплом, Ҷом ва туҳфаҳо қадршиносӣ гардиданд.
Ҳамчунин барои дар сатҳи баланд доир намудани чорабинӣ ба барпокунанданон сипосномаҳои Шуъбаи корҳои дохилии Ҷумҳурии Тоҷикистон дар шаҳри Хуҷанд ва Шӯрои ҷамъиятӣ оид ба мусоидати ҷомеаи шаҳрвандӣ ба ислоҳоти милитсия дар назди Раёсати Вазорати корҳои дохилии Ҷумҳурии Тоҷикистон дар вилояти Суғд супорида шуд.