Дастаи Академияи ВКД – ғолиби мусобиқаи волейбол

Дар мусобиқаи кушоди шахсӣ-даставӣ аз намуди «Волейбол», ки аз 10-уми март то инҷониб дар Маҷмааи варзишии ШҶ «Динамо» идома дошт, варзишгарони дастаи Академияи Вазорати корҳои дохилӣ ғолиб омаданд. 

Имрӯз, дар даври нимниҳоии мусобиқаи мазкур, ки дар он 16 дастаи Сарраёсат, раёсатҳо, шӯъбаҳо ва ҷузъу томҳои Дастгоҳи марказии ВКД, РВКД дар шаҳри Душанбе, ШВКД дар шаҳру ноҳияҳои ҷумҳурӣ дар чор гурӯҳ байни ҳам бозӣ намуданд, баргузор гардид.

Нахуст, барои ишғоли ҷойи сеюм дастаҳои Сарраёсати хадамоти давлатии оташнишонӣ ва Раёсати мубориза бо гардиши ғайриқонунии маводи мухаддир бо ҳам вохӯрданд. Дар ин бозӣ варзишгарони дастаи Сарраёсати хадамоти давлатии оташнишонӣ нисбатан фаъол буданд, ин буд, ки онҳо бо боварии комил дастаи ҳарифро бо ҳисоби 3:0 мағлуб сохта, сазовори мақоми сеюм гардиданд.
Сипас, ду дастаи нисбатан пурқуввати мусобиқа – Академияи ВКД ва Раёсати қӯшунҳои дохилӣ ба майдон баромада, барои ба даст овардани мақоми аввал маҳорати волейболбозии худро дар назди мухлисони бешумор нишон доданд. Гарчанде, дар ҳар як қисмати бозӣ ҳис мешуд, ки қувваи бозингарони ҳар ду даста бо ҳам баробаранд, вале волейболбозони дастаи Академияи ВКД зери роҳбарии капитани даста Муҳиб Латипов тавонистанд бо ҳисоби 3:0 дастаи ҳарифро мағлуб сохта, ғолиби мусобиқа эълон гарданд.
Мусобиқа дар сатҳи баланд ва бо лаҳзаҳои хотирмон доир гардида, хотири тамошобинону ҳаводорони ин риштаи варзишро шод гардонид.

Бояд зикр намуд, ки мусобиқаи мазкур дар доираи силсиламусобиқаҳо бахшида ба таҷлили Иди байналмилалии «Наврӯз» таҳти шиори «Ҷавонон – ояндасози Ватан» баргузор гардида, ҳадаф аз он обутоби ҷисмонии ҳайати шахсӣ, тарғибу ташвиқи варзиш миёни ҷавонон ва тарзи ҳаёти солим мебошад.
Дар охир ба дастаҳои ғолиби мусобиқа Ҷом, медал ва тӯҳфаҳои хотиравӣ тақдим карда шуданд.
Х. Солиҳов