Боздиди намояндагони ВКД Ҷумҳурии Тоҷикистон аз Сарраёсати корҳои дохилии шаҳри Тошканд

Ҳайати намояндагони ВКД Ҷумҳурии Тоҷикистон таҳти роҳбарии Ҳамоҳангсози миллӣ оид ба ислоҳоти милитсияи Вазорати корҳои дохилии Ҷумҳурии Тоҷикистон полковники милитсия Ҳамдамзода Валихон Ҳамдам дар доираи сафар ба Ҷумҳурии Ӯзбекистон аз Сарраёсати корҳои дохилии шаҳри Тошканд дидан намуданд.
Меҳмононро муовини сардори Сарраёсати корҳои дохилии шаҳри Тошканд, сардори Раёсати туризми бехатар, подполковник Улуғбек Аъзамхоҷаев истиқбол гирифт. Ҳамдамзода В.Ҳ. ва аъзои ҳайат дар бораи сохтор ва вазифаҳои асосии мақомоти ҳифзи ҳуқуқ, ислоҳот ва нақшаҳои оянда мухтасар суханронӣ карданд.
Сипас меҳмонон бо маркази иттилоотӣ-мултимедиявии Сарраёсати корҳои дохилии шаҳри Тошканд ва осорхонаи «Шон-Шараф» шинос шуданд. Ба ҳайати меҳмонон дар бораи фаъолияти маркази иттилоотӣ-мултимедиявӣ маълумот дода шуд. Ба таваҷҷуҳи тамошобинони осорхонаи «Шон-Шараф» намоиши либоси низомӣ, мошину тахникаҳо, воситаҳо ва аслиҳаи махсус, ки дар марҳилаҳои гуногуни ташаккули мақомоти корҳои дохилӣ истифода мешуданд, пешниҳод гардид.

Меҳмонон инчунин бо фаъолияти Маркази ҳифзи ҳуқуқи Учтеппа дар назди Шуъбаи корҳои дохилии №2-и ноҳияи Чилонзор шинос шуданд. Мавриди қайд аст, ки дар Ҷумҳурии Ӯзбекистон соли 2022 ҳамчун “Соли эҳтироми инсон ва маҳаллаи фаъол” эълон гардида, ин маркази ҳифзи ҳуқуқ бо дарназардошти ҷойгиршавии қулай дар чанд маҳалла ва фароҳам овардани шароити мусоид ба манфиати мардум хизмат менамояд. Бинобар ин аз ҷониби меҳмонон махсусан қайд карда шуд, ки хизмат ба манфиати мардум меъёри асосии фаъолияти мақомоти корхои дохилӣ мебошад.

Гул Маҳбуба