Баргузории семинари омӯзишӣ дар мавзӯи "Муқовимат ба зӯроварӣ дар оила, пешбурди масоили гендерӣ дар ҳамкории милитсия бо ҷомеа"

Дар асоси дастуру супориш ва дастгириҳои бевоситаи Вазири корҳои дохилии Ҷумҳурии Тоҷикистон, генерал- полковники милитсия Раҳимзода Рамазон Ҳамро ва нақша-чорабиниҳои ВКД Ҷумҳурии Тоҷикистон дар самти дар ҳаёти воқеӣ ҷорӣ кардани талаботи санадҳои меъёрии ҳуқуқии соҳавии таъмини масоили гендерӣ ва пешгирии зӯроварӣ дар оила дар байни кормандони ШВКД дар шаҳру ноҳияҳои минтақаи Кӯлоб ва аъзоёни Шӯроҳои ҷамъиятии назди мақомоти корҳои дохилӣ дар минтақаи мазкур 14-16-уми декабри соли ҷорӣ семинар-машварати омӯзишӣ баргузор гардид.

Семинарро ёвари Ҳамоҳангсози миллӣ оид ба ислоҳоти милитсия майори милитсия Шарифзода Хушбахт ҳусни ифтитоҳ бахшида, талаботи роҳбарият ВКД ва мақсади баргузории чорабиниро баён кард.
Дар чорабинии омӯзишӣ омӯзгорони Академияи ВКД Абдулаҳадзода А.А. ва Нуриддинзода С.Н. ба ҳайси тренер ҷалб гардида, дар давоми се рӯз бо риояи тамоми қоидаҳои педагогӣ ва омодагии сатҳи баланд муқаррароти қонунгузориро дар самти таҳқиқшаванда ба иштирокчиён омӯзониданд. Дар раванди баргузории семинар трененерон танҳо аз усулҳои интерактивии омӯзиш истифода карда, фикру ақидаи иштирокчиёнро ҷиҳати мушкилоти татбиқи амалии меъёрҳои қонунгузорӣ мавриди баррасӣ ва муҳокима қарор доданд.
Дар хотима масъалаҳои дар чорабинӣ баррасигардида аз ҷиҳати назариявӣ ва татбиқи амалӣ дар ҳамбастагии фикру ақидаи ҳамаи иштирокчиён ҳал ва ҷамъбаст гардида, кормандони амалӣ ёдовар шуданд, ки дар фаъолияти кории хеш ва дар ҳамкорӣ бо аҳолӣ муқаррароти қонунгузориро оид ба масоили баробарии гендерӣ риоя, иҷро ва татбиқ менамоянд.
Чорабинӣ дар сатҳи баланд ташкил гардида, ҳамаи иштирокчиён ба роҳбарияти ВКД ҷиҳати баргузории он миннатдории худро изҳор намуданд.