Пешбурди масоили гендерӣ дар раванди ҳамкории милитсия бо ҷомеа

Бо мақсади иҷрои қарори Ҳукумати Ҷумҳурии Тоҷикистон №211 аз 1 июни соли 2021 оид ба Барномаи ислоҳоти милитсия барои солҳои 2021-2025, Фармони ВКД Ҷумҳурии Тоҷикистон аз 10 июни соли 2017, №256 "Дар бораи Шӯрои ҷамъиятӣ оид ба мусоидати ҷомеаи шаҳрвандӣ дар таъмини тартиботи ҷамъиятӣ дар назди мақомоти милитсия" 7-уми декабри соли 2021 бо иштироки 10 нафар нозирони минтақавӣ ва 5 нафар аъзоёни Шӯрои ҷамъиятӣ оид ба мусоидати ҷомеаи шаҳрвандӣ дар таъмини тартиботи ҷамъиятӣ дар назди ШВКД-ҳои минтақа ва ноҳияи Рашт дар мавзӯи "Пешбурди масоили гендерӣ дар раванди ҳамкории милитсия бо ҷомеа" семинари омӯзишӣ баргузор гардид. Барои омӯзиш тренерон-омӯзгорони Академияи ВКД Абдулаҳадзода А. ва Нуриддинзода С. сафарбар гардиданд.
Сараввал Ёрдамчии Ҳамоҳангсози миллӣ оид ба ислоҳоти милитсия майори милитсия Шарифзода Х. бо овардани иқтибос аз суханронии Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон чорабиниро ҳусни оғоз бахшида, қайд намуд: "Маҳаки асосии ислоҳоти милитсияро бояд ҳамкории зичи мақомот бо ҷомеа ташкил намуда, дар раванди пешбурди фаъолият зимни пешгирии ҷинояткорӣ ва мубориза бо он бояд аз имкониятҳои аҳли ҷомеа ва ниҳодҳои ҷамъиятӣ васеъ истифода намуд". Вазири корҳои дохилии Ҷумҳурии Тоҷикистон Раҳимзода Рамазон Ҳамро дар ин раванд таъкид месозанд, ки "Маҳз бо дастгирии аҳолӣ, зиёиену равшанфикрон, аҳли ҷамоатчигӣ, намояндагони маориф, кормандони муассисаҳои таълимӣ, ҷавонон, ба хусус донишҷӯён мо метавонем бо падидаҳои номатлуби ҷомеа, ки имрӯз моро ба ташвиш овардааст, мубориза барем".
Сухан ба Абдулаҳадзода А. дода шуд. Абдулаҳадзода дар оғози сухан маълумот дод, ки бо Фармоиши Вазири корҳои дохилии Ҷумҳурии Тоҷикистон генерал-полковники милитсия Раҳимзода Р.Х. аз 30 июли соли 2020, рақами 417 "Роҳнамо оид ба ҳамкории милитсия бо ҷомеа" тасдиқ гардидааст, ки масъалаҳои ба роҳ мондани ҳамкории самараноки милитсия бо ҷомеаро дар бар мегирад.
Сипас бо ҳамроҳии Нуриддинзода С.Н. мувофиқи барномаи семинар ба иштирокчиён бо ташкили кор дар гурӯҳҳо, муаррифӣ ва саволу ҷавоб бо санъати волои суханронӣ, бо маҳорати баланди андешаронӣ, бо беҳтарин муошират омӯзиш ташкил намуда, бо доштани луғати бойи калимаҳои соҳавӣ (терминҳо) мавзӯъҳои дар боло зикргардидаро соддаю оммафаҳм баён намуданд.
Дар раванди семинар намояндагони ҷомеа баромад намуда, аз баргузории чунин тарзи семинар яъне дар якҷоягӣ бо иштироки намояндагони милитсия ва ҷомеа ташкил шудани семинари омӯзишӣ, фикру андешаҳои худро иброз медоштанд. Чорабинии мазкур то рӯзи 9-уми декабр идома меёбад.