Рӯзи 14 декабри соли 2021 муовини Вазири корҳои дохилии Ҷумҳурии Тоҷикистон, генерал-майори милитсия Ҳамидзода Бароталӣ Партов бо гузоришгари вежаи СММ оид ба савдои одамон Сиобан Муллалӣ вохӯрӣ доир намуд.

Дар ҷараёни вохӯрӣ ҷонибҳо оид ба масъалаҳои ҳамкориҳо дар самти пешгирии савдои одамон ва муҳоҷирати ғайриқонунӣ табодули афкор намуданд.
Зикр гардид, ки Ҷумҳурии Тоҷикистон ҷиҳати самаранок ба роҳ мондани муқовимат ба савдои одамон мунтазам тадбирҳои ҳуқуқиву ташкилии зарурӣ меандешад.
Дар ин радиф, бо мақсади ташкили муқовимат ба савдои одамон, ҳифз ва расонидани кӯмак ба қурбониёни савдои одамон ва тавонбахшии онҳо, соли 2014 Қонуни Ҷумҳурии Тоҷикистон «Дар бораи муқовимат ба савдои одамон ва расонидани кӯмак ба қурбониёни савдои одамон» қабул карда шудааст.
Ҳамзамон бо Қарори Ҳукумати Ҷумҳурии Тоҷикистон таҳти №80 аз 1 марти соли 2019 «Нақшаи миллии муқовимат бо савдои одамон дар Ҷумҳурии Тоҷикистон барои солҳои 2019-2021» тасдиқ гардид, ки ин иқдоми хайрхоҳона ва башардӯстона аз таваҷҷуҳу ғамхориҳои Президенти Ҷумҳурии Тоҷикистон муҳтарам Эмомалӣ Раҳмон ва қонунгузории мамлакат нисбати шаҳрвандон шаҳодат медиҳад.
Аз ҷониби Вазорати корҳои дохилии Ҷумҳурии Тоҷикистон бо мақсади баланд бардоштани савияи дониш, малакаи касбии кормандони мақомоти корҳои дохилӣ ва дигар сохторҳои ҳифзи ҳуқуқ дар самти муқовимат ба савдои одамон дар Академияи ВКД курсҳои махсус ва курсҳои мунтазами такмили ихтисос ташкил ва ба роҳ монда шудаанд.
Дар хотимаи вохӯрӣ ҷонибҳо ҷиҳати боз ҳам тақвият бахшидани ҳамкориҳои минбаъда изҳори боварӣ намуданд.

Гул Маҳбуба