Ҳумоюн бод истиқлоли тоҷик!

8-уми сентябри соли 2023 дар толори асосии Вазорати корҳои дохилӣ ба ифтихори таҷлил аз 32-юмин солгарди Истиқлоли давлатӣ ва 30-солагии Қувваҳои Мусаллаҳи Ҷумҳурии Тоҷикистон ҷамъомади тантанавӣ бо иштироки Вазири корҳои дохилӣ генерал-полковники милитсия Раҳимзода Рамазон Ҳамро, роҳбарият ва ҳайати шахсии мақомоти корҳои дохилӣ баргузор гардид.

Ҷамъомади бошукӯҳи идона бо садо додани Суруди миллии Тоҷикистон оғоз шуд.
Вазири корҳои дохилӣ генерал-полковники милитсия Раҳимзода Рамазон Ҳамро зимни суханронии табрикии худ истиқлоли давлатиро бузургтарин ва муқаддастарин неъмат, ифтихор ва номуси ватандорӣ, асоси хушбахтиву сарбаландии сокинони Тоҷикистон маънидод карда, зикр намуд, ки ҳамаи ин дастовардҳо бо шарофати ҷаҳду талошҳо ва заҳмату меҳнати Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба даст омадааст.
Таъкид гардид, ки дар арафаи ин ҷашнҳои бузургу миллӣ аз ҷониби Роҳбари давлат 2 нафар кормандони мақомоти корҳои дохилӣ бо рутбаи олии ҳарбии «генерал-майор» ва 15 нафари дигар бо рутбаи навбатии «полковники милитсия» қадрдонӣ гардиданд.
Сипас, дар фазои тантанавӣ Вазири корҳои дохилӣ генерал-полковники милитсия Раҳимзода Рамазон Ҳамро ба онҳо рутбаҳои махсуси навбатиро супорида, изҳор дошт, ки аз ҷониби Роҳбари давлат ва Ҳукумати мамлакат хизматҳои фарзандони содиқу далер ва матиниродаи Ватан пайваста қадршиносӣ гардида, ба онҳо ғамхорӣ ва таваҷҷӯҳи хоса зоҳир карда мешавад.
Гул Маҳбуба