Натиҷагирӣ аз озмуни «Хониши шоҳасари Бобоҷон Ғафуров - китоби «Тоҷикон»»

Баҳри дар амал татбиқ намудани сиёсати хирадмандонаи Сарвари давлат бо ташаббус ва ибтикори бевоситаи Вазири корҳои дохилӣ генерал-полковники милитсия Раҳимзода Рамазон Ҳамро барои баланд бардоштани сатҳи донишу илмомӯзӣ ва маърифатнокии кормандони мақомоти корҳои дохилӣ, воқиф гардидан аз таъриху фарҳанг, адабиёту маданияти бойю ғании миллати тоҷик озмуни ҷумҳуриявии «Беҳтарин донандаи китоби Тоҷикон»-и аллома Бобоҷон Ғафуров дар байни ҷузъу томҳои МКД баргузор гардид.
Бояд қайд кард, ки раванди баргузории озмун ва шаффофияти он таҳти назорати қатъии роҳбари аввали ВКД, аъзоҳои комиссияи назоратӣ, аз Академияи ВКД ва сардабири ҳафтаномаи «Қонун ва ҷомеа»-и назди Дастгоҳи Вазири корҳои дохилӣ полковники милитсия Ҳасан Шерализода қарор гирифт ва ба ҳар як иштирокчии озмун дуруст баҳогузорӣ шудани ҷавобҳояшон баръало айён буд.
Дар ин замина, 16-уми декбари соли 2022 дар толори маҷлисгоҳи ВКД даври ниҳоии Озмуни «Хониши шоҳасари Бобоҷон Ғафуров - китоби «Тоҷикон»» доир гардид.
Муовини Вазири корҳои дохилӣ генерал-майори хизмати дохилӣ Иброҳимзода Нозим чорабинии фарҳангиро ифтитоҳ намуда, аз ҷумла таъкид кард, ки озмуни мазкур идомаи мантиқии тадбирҳо дар роҳи ривоҷ додани китобдорию китобхонӣ дар мамлакат мебошад. Ҳамчунин мавсуф иброз дошт, ки даври аввали Озмуни «Хониши шоҳасари Бобоҷон Ғафуров - китоби «Тоҷикон»» дар байни тамоми кормандони ҷузъу томҳои МКД баргузор гардид, ки аз ин миён 20 нафар ба даври ниҳоии он роҳхат ёфта, имрӯз байни ҳам рақобат намуданд.
Аз ҷониби Комиссияи махсус таъсис додашуда муайян карда шуд, ки ҷойи аввалро майори милитсия Шарифзода Хусрав Акбарпур –нозири калони гуруҳи таҳлилӣ ва корҳои статистикии Раёсати ВКД дар минтақаи Рашт, ҷойи дуюмро майори милитсия Ҷуразода Шамшод Кенҷа муовини сардори ШВКД дар ноҳияи Ашт ва ҷои сеюмро майори милитсия Бахтиёри Ҷунайд –нозири минтақавии ШВКД дар ноҳияи Шаҳринав ишғол намуданд.Ба ғолиби ҷойи якум 3000 сомонӣ, ба ғолиби ҷойи дуюм 2000 сомонӣ ва ба ғолиби ҷойи сеюм 1000 сомонӣ супорида шуд.

Бояд тазаккур дод, ки ҳадафи асосии баргузории чунин чорабиниҳо он аст, ки ҳар як шаҳрванд, хоса наврасону ҷавонон на танҳо кӣ будани аҷдодони худро донанд, ҳамчунин осори гаронарзиши гузаштагон ва фарҳанги қадимаи миллати тоҷикро барои ҷаҳониён муаррифӣ карда тавонанд. Ин амалҳо замоне имконпазир мегардад, ки ҳамаи мардум рӯ ба омӯзиш ва мутолиаи китоб оранд.
Дар интиҳои чорабинӣ ба дигар иштирокчиёни Озмуни «Хониши шоҳасари Бобоҷон Ғафуров - китоби «Тоҷикон»» аз ҷониби роҳбарияти Вазорат Сипосномаву Ифтихорнома ва Раҳматномаҳо тақдим карда шуданд.

Абдулмуъмин Зайниддинзода,
Муродалӣ Саидзода