Сарбозон пас аз касбомӯзӣ соҳиби шаҳодатнома гардиданд

Баҳри таъмини дастуру супоришҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати ба касбомӯзӣ фаро гирифтани сарбозону наваскарон Вазорати корҳои дохилӣ курсҳои кӯтоҳмуддати касбомӯзиро дар қисмҳои ҳарбии Раёсати қӯшунҳои дохилӣ роҳандозӣ намудааст, ки барои соҳибкасб шудани сарбозон мусоидат менамоянд.

Дар курсҳои касбомӯзӣ сарбозону наваскарон соҳиби ихтисосҳои ошпаз, нонпаз, сартарош, кандакор, устои барқ, устои таъмири муҳаррики нақлиётҳо, дуредгар, кафшергари барқӣ ва сантехник гардида, ҳамчунин ба курсҳои бозомӯзии компютерӣ ва забонҳои русӣ ва англисӣ фаро гирифта мешаванд.
Муҳлати таҳсил дар курсҳои омӯзишӣ се моҳ муқаррар гардида, баъди аз худ кардани нозукиҳои касб ба сарбозон шаҳодатнома (сертификат) супорида мешавад.
15 ноябри соли 2022 дар идомаи ин иқдом дар қисми низомии 5453-и Раёсати қӯшунҳои дохилии ВКД бо иштироки муовини Вазири корҳои дохилӣ генерал-майори милитсия Насимзода Акбар Ғиёс ва Фармондеҳи Раёсати қӯшунҳои дохилӣ генерал-майор Рауфзода Суҳроб Орзу маросими супоридани шаҳодатномаҳо доир гардид.

Мавриди қайд аст, ки дар ин чорабинӣ пас аз анҷоми курсҳои кутоҳмуддати касбомӯзӣ 142 сарбоз соҳиби шаҳодатнома гардиданд.
Муовини Вазири корҳои дохилӣ генерал-майори милитсия Насимзода А.Ғ. сарбозонро ба муносибати хатми курсҳои касбомӯзӣ ва соҳиби шаҳодатнома гардидан табрику муборакбод намуда, ба онҳо барору комёбиҳо таманно намуд.