Боздиди Вазири корҳои дохилӣ аз рафти корҳои ободонӣ дар вилояти Хатлон

24 августи соли 2022 Вазири корҳои дохилии Ҷумҳурии Тоҷикистон генерал - полковники милитсия Раҳимзода Рамазон Ҳамро бо сафари хизматӣ ба шаҳри Бохтари вилояти Хатлон ташриф овард.

Дар ҷараёни сафар Вазири корҳои дохилӣ бо лоиҳаҳои маҷмааи ҳавзи шиноварӣ барои кормандони милитсия, Маркази таълимии Раёсати Хадамоти оташнишонии ВКД дар вилояти Хатлон ва бинои маъмурии раёсати мазкур, ки оғози сохтмонашон дар рӯзҳои наздик дар назар аст, шиносоӣ пайдо кард.
Инчунин аз рафти корҳои ободонӣ дар Раёсати ВКД дар вилояти Хатлон боздид ба амал оварда, ҷиҳати идома додани корҳои ободонию бунёдкорӣ дастурҳои мушаххас дод.
Ҳамзамон Вазири корҳои дохилӣ аз ДТММ дар вилояти Хатлон ва қисми ҳарбии 3503-и Раёсати қӯшунҳои дохилӣ дидан намуда, бо хизматчиён ва афсарону сарбозон мулоқот доир намуд.

Мавсуф онҳоро ба муносибати ҷашни 31-солагии Истиқлолияти давлатии Ҷумҳурии Тоҷикистон табрику таҳният намуда, ҷиҳати пурзӯр намудани фаъолияти хизматӣ як қатор дастуру супоришҳо дод.
Ҳамзамон сардори Раёсати ВКД дар вилояти Хатлон полковники милитсия Нозимзода Файзулло Ватан ба Вазири корҳои дохилӣ аз рафти корҳои сохтмонӣ дар Шуъбаҳои ВКД дар шаҳру ноҳияҳои вилояти Хатлон ба таври муфассал бо пешниҳоди ангораҳо гузориш дод.