Поси хотири генерал-майори мустаъфии милитсия шодравон Темурҷон Раҳимбоев

Рӯзи 25-уми октябри соли 2019 дар толори маҷлисгоҳи Раёсати ВКД дар вилояти Суғд ба муносибати 75-умин солгарди мавлуд ва гиромидошти хотираи генерал-майори мустаъфии милитсия шодравон Темурҷон Раҳимбоев маҳфили ёдбуд баргузор гардид. Дар маросими поси хотир роҳбарияти Раёсат, ҳайати шахсӣ, собиқадорони мақомот, намояндагони мақомоти ҳокимияти давлатӣ ва шогирдону пайвандон иштирок доштанд. Ин чорабинӣ бо ташаббус ва пешниҳоди Шӯрои созмони собиқадорони мақомоти корҳои дохилӣ дар вилояти Суғд, ки бо қарори МИҲД вилоят тасдиқ шудааст, ҳамчун рамзи эҳтиром ба шахсияти собиқадори хизматнишондодаи милитсия Темурҷон Раҳимбоев баргузор гашт.

Ҷоиз ба зикр аст, ки генерал Т. Раҳимбоев аз зумраи кадрҳои маҳаллии милитсия дар даврони Тоҷикистони шӯравист, ки давоми солҳои 1969 - 1997 аз корманди қаторӣ то ба зинаҳои баланди роҳбарикунанда, сардори шуъбаи корҳои дохилӣ, сардори РКД ва муовини вазири корҳои дохилӣ ба камол расидааст. Нафарони зиёд аз ҳамкор ва шогирди ӯ будан ифтихор дошта ба ҳайси устоди роҳнамо эҳтиромаш менамуданд. Риштаи умри ин марди наҷиб дар натиҷаи садамаи фоҷиавии тайёра канда шуда, кору амал ва эҳтироми мавсуф натанҳо дар хотираи ҳампешагону пайвандон, балки ҳамчун корманди содиқ ба Савганд ва баландрутбаи мақомоти милитсия дар дилу дидаи халқ, бахусус сокинони шаҳри Хуҷанд нақш бастааст. Маҳз ба ҳамин хотир дар вақти дар қайди ҳаёт будан Темурҷон Раҳимбоев «Шаҳрванди фахрии шаҳри Хуҷанд»-ро сазовор гардида буд.

Ҷаласаи тантанавиро бо маърӯза аз ҳаёт ва фаъолияти хизматии шодравон генерал-майори милитсия Т.Раҳимбоев, муовини аввали сардори Раёсати ВКД дар вилояти Суғд полковники милитсия Музаффар Ализода ифтитоҳ намуда, дар идома ҳамкасбон, шогирдон ва пайвандони Т.Раҳимбоев бо ёдоварӣ аз кору пайкор хотираи ӯро пос доштанд. Қайд карда шуд, ки оромӣ ва осоиштагӣ дар Тоҷикистони маҳбуб натиҷаи заҳмати ҳамингуна афроди масъулиятшинос аст, ки дар таърихи Ватан номашон абадӣ сабт гаштааст.
Акбар Шарифӣ, майори милитсия