Суғд: Аёдати иштирокчии 95-солаи ҶБВ

Ҳарчанд солҳо гузаштааст даҳшати хонумонсӯзи Ҷанги Бузурги Ватанӣ аз ёдҳо намеравад. Аёдату дидорбинии иштирокчиёни ҶБВ, нафарони дар ақибгоҳ хизмат намуда дар арафаи Рӯзи Ғалаба анъана гардида, гувоҳӣ он аст, ки хизмати диловаронаи иштирокчиёни ҶБВ ба нафъи Ватан ҳеҷ гоҳ фаромӯш намешавад.
Иштирокчии Ҷанги Бузурги Ватанӣ собиқадори 95-солаи мақомоти корҳои дохилӣ Қаюмов Абдувалӣ сокини ҷамоати деҳоти Хонободи шаҳри Исфара аз зумраи он сарбозони музаффарест, ки баъди ҷанг фаъолияти хизматиаш дар сохтори ВКД гузаштааст.
Иштирокчии ҷангро дар арафаи Рӯзи Ғалаба бо дастури Вазири корҳои дохилӣ генерал-полковники милитсия Раҳимзода Рамазон Ҳамро роҳбарияти Раёсати ВКД дар вилояти Суғд дар манзили истиқоматиаш аёдат намуда кӯмаки моддӣ расониданд.
Муовини аввали сардори Раёсати мазкур полковники милитсия Музаффар Ализода, Абдувалӣ Қаюмовро ба Иди ғалаба табрик намуда, саҳми ӯ ва ҳамяроқонашро дар торумори душман ва хомӯш кардани оташи ҷанги хонумонсӯз намунаи олии ватандӯстӣ ва мактаби зиндаи тарбияи насли ҷавон дар ҳамин рӯҳия унвон кард.
Иштирокчии ҶБВ аз ёддоштҳояш аз ҷабҳаи ҷанг, ки аз синни 16 солагӣ вориди он гардида буд, фаъолияти 32 сола дар сафи мақомоти милитсия, собиқаи меҳнатии баъди нафақа ба меҳмонон нақл намуд. Мавсуф шоҳиди зиндаи набардҳо бар зидди қувваҳои гитлерӣ дар хоки Россия, Украина, Беларусия, Полша ва Чехословакия аст. Имрӯзҳо дар сохтори мақомоти милитсияи вилояти Суғд аз иштирокчиёни ҶБВ танҳо Абдувалӣ Қаюмов дар қайди ҳаёт ҳаст, ки таҳти ғамхории Ҳукумати вилоят ва мақомоти корҳои дохилӣ қарор дорад.

Ҷоиз ба таъкид аст, ки онҳое, ки сина сипар намуда бар зидди душман ҷангидаанд ва аз болои ӯ ғалаба кардаву инсониятро аз зулму ситам озод ва зиндагии осоиштаро дар курраи олам таъмин намуданд, дар дилу дидаи мардум ҷой гирифта корномаи онҳо ҳеҷ гоҳ фаромӯш нахоҳад шуд.
Акбар Шарифов, капитани милитсия