Саҳмгузорӣ дар ободии диёр

Милитсия дар баробари иҷрои вазифаҳои хизматӣ, инчунин ба дигар масъалаҳо, аз ҷумла ба корҳои ободониву созандагӣ низ мароқ зоҳир менамояд. Ҳамин аст, ки кормандони бахшу воҳидҳои гуногуни мақомоти корҳои дохилӣ пайваста аз худ ташаббус нишон дода, дар ободию зебогии диёр саҳмгузорӣ менамоянд.

Чанде пеш як гурӯҳ ҷавонони касбу кори гуногун зери роҳбарии сардори Хадамоти пешгирии ҳуқуқвайронкунӣ байни ноболиғон ва ҷавонони Вазорати корҳои дохилӣ полковники милитсия Фаттозода Абдусаттор Абдуқаҳор, бо мақсади тозаю озода намудани боғи канори чойхонаи «Роҳат»-и шаҳри Душанбе, ба ҳашар баромаданд. Зимни ин шанбегии дастаҷамъона роҳбарият ва ҳайати шахсии Хадамоти мазкур ҳамроҳи донишҷуёну ҷавонони фаъоли гурӯҳи «Авангард» ҳудуди мавзеи мазкурро тозаю озода карда, бехи дарахтонро нарм намуданд.
Дар ин ҳашари умумӣ беш аз 200 нафар иштирок карданд.

Ёдовар мешавем, ки ин шанбегии аввал нест, ки бо ташаббуси масъулини Хадамоти пешгирии ҳуқуқвайронкунӣ байни ноболиғон ва ҷавонони ВКД дар ҳудуди шаҳри Душанбе роҳандозӣ мегардад. Аз ин пештар кормандони Хадамоти зикршуда дар якҷоягӣ бо донишҷӯёну ҷавонони фаъол дар дигар боғу ҷойҳои ҷамъиятии пойтахт ва канори кӯлу дарёҳо ба шанбегӣ баромада, ҳудуди ин гуна маконҳоро тозаю озода намуданд.
Абдулло ШОҲИЁН,
Дилшод ХОЛОВ