ВКД ҳамеша ниёзмандонро дастгирӣ менамояд

Дастгирии табақаи ниёзманд ва ҳамаҷониба кумак расонидан ба онҳо аз сиёсатҳои хирадмандонаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон буда, дар ин замина, дар баробари тамоми мақомоту идораҳои давлатӣ Вазорати корҳои дохилӣ ва ҷузъу томҳои он низ ба ин кору амали хайр даст мезананд. Бояд гуфт, ин иқдоми наҷиб ҳамеша дар мадди назари Вазири корҳои дохилӣ генерал-полковники милитсия Раҳимзода Рамазон Ҳамро қарор дошта, бо ин мақсад пайваста тадбирҳои зарурӣ андешида мешавад.

Дар доираи чунин ташаббускориҳо, рӯзи 29-уми апрел, як гурӯҳ курсантони Академияи ВКД ва ҷавонони фаъоли гурӯҳи «Авангард», зери роҳбаладии сардори Хадамоти пешгирии ҳуқуқвайронкунӣ байни ноболиғон ва ҷавонони ВКД полковники милитсия Фаттозода Абдусаттор Абдуқаҳҳор, муовини сардори Академияи ВКД полковники милитсия Шарифзода Мирзо Сангинмурод ва раиси Шӯрои ҷавонони ин таълимгоҳи олии касбӣ лейтенанти калони милитсия Сафармуҳаммад Мардонов ба Муассисаи давлатии маркази миллии тавонбахшии кӯдакони маъюб «Чорбоғ»-и ноҳияи Варзоб ташриф оварданд.
Дар доираи иқдоми мазкур, ки бо мақсади тозаю озода нигоҳ доштани гирду атрофи бинои ин муассисаи давлатӣ, гузаронидани шанбегии дастаҷамъона, нарм намудани бехи гулу буттаҳо ва ниҳолҳои боғчаи муассиса ва тоза намудани дохили ҳуҷраҳои хоби таълимгирандагон анҷом гирифт, ҳамчунин барномаи фарҳангӣ-фароғатӣ намоиш дода шуд.
Дар интиҳои чорабинии мазкур маъмурият ва мураббиёну тарбиятгирандагони Муассисаи давлатии маркази миллии тавонбахшии кӯдакони маъюб «Чорбоғ» барои ин ташаббуси хайрхоҳона ба роҳбарияти ВКД ва Академияи он изҳори миннатдорӣ намуданд.
У. ОЛИМ,
Ш. УБАЙДУЛЛОЕВ