Биёмӯзу бишнав зи ҳар донише…

Рӯзи 17-уми апрел дар муассисаи таҳсилоти миёнаи умумии №91-и ноҳияи Синои шаҳри Душанбе вохӯрии сардори Хадамоти пешгирии ҳуқуқвайронкунӣ байни ноболиғон ва ҷавонони (ХПҲНҶ) ВКД полковники милитсия Абдусаттор Фаттозода, сардори Сарраёсати маорифи шаҳри Душанбе Азизӣ Маҳмадалӣ Миралӣ, мудири шуъбаи маорифи ноҳияи Сино Носирзода Муқаддаси Носир ва муовини сардори Раёсати кор бо ҷавонон ва варзиши Ҳукумати шаҳри Душанбе Маҳкамбой Гулов бо омӯзгорону хонандагон ва волидон баргузор гардид.
Нахуст сардори ХПҲНҶ полковники милитсия Абдусаттор Фаттозода дар бораи ҷинояткорӣ дар байни ҷавонону наврасон баромад намуда, зикр кард, ки давоми се моҳи аввали соли ҷорӣ вобаста ба ин 25 ҳолати ҷиноят ба қайд гирифта шудааст, ки аз ин шумора 2 нафарашон хонандагони муассисаҳои таълимии ноҳияи Сино мебошанд.
«Вазифаи ҳар як хонанда ин аст, ки бо баҳои хубу аъло таҳсил намуда, саҳми арзандаи хешро дар пешрафти ин сарзамин гузорад. Бояд ҷавонону наврасон пайваста пайи омӯзиши илму маърифат буда, дар мусобиқаҳои варзишӣ иштирок намуда, номбардори падару модар гарданд», - афзуд ӯ.
Ҳамчунин, мавсуф дар идомаи суханрониаш илова кард, ки имрӯзҳо аз тарафи Ҳукумати мамлакат баҳри солимгардонии ҷомеа як қатор иншооти гуногуни варзишӣ сохта ба истифода дода шудааст, ки баҳри пешгирии ҷинояткорию оворагардии насли ҷавон ва баланд бардоштани рӯҳияи ватандӯстӣ тамоми шароитҳои замони муосир муҳаё гардидаанд.
А.Фаттозода зимни баромад, ҳамзамон дар бораи талаботи Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» изҳори андеша намуда, зикр сохт, ки минбаъд низ баҳри тарбияи фарзандон тамоми чораҳои зарурӣ бояд андешида шаванд.

Дар ин вохӯрӣ, ҳамчунин масъулину намояндагони дигар идораҳои дахлдор низ баромадҳо карданд. Аз ҷумла, сардори Сарраёсати маорифи шаҳри Душанбе Азизӣ Маҳмадалӣ Миралӣ доир ба таълиму тарбияи насли наврас ва рисолати омӯзгор андешаҳояшро баён намуд.
Сипас, дар бораи одобу ахлоқи наврасон изҳори андеша намуда, аз пешгирии муноқишаҳои байнимактаббачагон ёдовар шуд, ки ин масъала кормандони соҳаи маориф ва дигар мақомоти дахлдорро ба ташвиш андохтааст. «Аз ин рӯ, аз тамоми волидон хоҳиш карда мешавад, ки баҳри пешгирии ин қонуншиканиҳо худро бетараф нагузошта, тамоми чораҳои заруриро барои тарбияи фарзандон андешанд ва нисбати тақдири фарзандонашон бетарафӣ зоҳир накунанд», - гуфт ӯ.
Зимни ин вохӯрӣ узви гурӯҳи «Авангард» Изатулло Музаффаров дар бораи шароитҳои муҳаёсохтаи давлат ва пос доштани арзишҳои миллӣ ибрози андеша намуда, зикр кард, ки «мо бояд ҷавобан ба ғамхориҳои роҳбарияти давлат пайи аз худ намудани илму дониш шавем ва дар ин замина, барои аз худ намудани тарзи истифодаи техникаву технологияҳои замонавӣ кӯшиш намоем, зеро нафаре ки пайи омӯзиш мешавад, дар зиндагӣ ба муваффақиятҳо ноил мегардад».

Абдулло ШОҲИЁН,
Тоҷиддин ЛАТИПОВ