Мулоқоти кормандони милитсия бо волидайн ва мактаббачагон дар шаҳри Бохтар

Кормандони ШВКД дар шаҳри Бохтар дар якҷоягӣ бо намояндагони ҳукумати маҳалӣ дар муассисаи таҳсилоти миёнаи умумии №12-и шаҳри мазкур сӯҳбату вохӯрӣ дар мавзӯи масъулияти падару модар дар таълим ва тарбияи фарзанд, пешгирии ҷинояткорӣ дар байни ноболиғон ва шомилшавии ҷавонон ба ҳизбу ҳаракатҳои ифротгароӣ гузаронида шуд.
Дар ин ҷамъомад омӯзгорон, падарону модарон ва хонандагони синфҳои болоӣ иштирок намуданд.
Нахуст, сардори ШВКД дар шаҳри Бохтар полковники милитсия Набиҷон Исозода баромад намуда, зикр кард, ки фарзанд маҳсули оила асту тарбияаш аз хонадон ва панди падару модар маншаъ мегирад. Падару модар вазифадоранд, ки тарбияи маънавӣ, маърифатӣ ва ахлоқии фарзандро то ҳадди зарурӣ дуруст ба роҳ монанд.

Таълиму тарбияти дурусти фарзандон, манъ намудани онҳо аз корҳои зишт ва даст задан ба ҷиноятҳо аз қабили дуздиву ғоратгарӣ ва дигар кирдорҳои номатлуб вазифаи волидайн ва дар рӯҳияи худшиносӣ, ватандорию ватанпарастӣ ва бо ахлоқи ҳамидаю писандида тарбия намудани онҳо яке аз масъалаҳои асосии ҷомеаи имрӯзаи мо ба шумор меравад.
Дар ин ҷамъомад таъкид карда шуд, ки дар тарбияи насли наврас, оила, мактаб ва ҷомеа бояд дар якчоягӣ фаъолият намоянд.
Иштирокдорони ин вохӯрӣ тақозо намуданд, ки бояд наврасону чавонон, зираку ҳушёр бошанд ва ба ҳар гуна гурӯҳҳои ҷиноятӣ, ҳизбу ҳаракатҳои бегона ҳамроҳ нашаванд. Зеро ояндаи ҷомеаи моро метавон бо ақлу заковати расо ва ҳисси ватанпарастиву эҳтироми арзишҳои он беолоиш нигоҳ дошт.
Иштирокдорон дар ҷамъомад фикру ақидаи худро баён намуда, баромадҳои судманд карданд.
Чунин вохӯриҳо дар муассисаҳои таҳсилоти миёнаи умумии шаҳри Бохтар идома дорад.
Офоқ Қодириён