Раёсати ВКД дар вилояти Суғд
Мутобиқи нақшаи чорабиниҳои Раёсати ВКД дар вилояти Суғд ба муносибати 30-солагии рӯзи қабули Конститутсияи Ҷумҳурии Тоҷикистон ва ҷашни касбии Рӯзи милитсияи тоҷик гузаронидани як қатор чорабиниҳо пешбинӣ шудааст. Бо мақсади ҷалби ҳайати шахсӣ ба варзиш ва тарғиби тарзи ҳаёти солим баргузории мусобиқаҳои варзишӣ ҷузъӣ чорабиниҳои мазкур мебошад.  
Аз ҷумла, бо иштироки ҳайати шахсии шуъбаву хадамотҳои дастгоҳи марказии Раёсат мусобиқаи варзишии «Дав» миёни мардон дар масофаи 5 километр гузаронида шуд. Ҳарчанд зимни машғулиятҳои варзишӣ ин намуди варзиш ҳафтае як маротиба доир шуда кормандон меъёри тайёрии ҷисмонӣ супоранд ҳам, аз ҷиҳати мусобиқа будан беҳтаринҳо бояд муайян мешуданд. Раванди мусобиқа аз ҷониби кормандони шуъбаи кадрҳо ва кор бо ҳайти шахсии Раёсат ва масъулини Шӯрои ҷумҳуриявии варзишии «Динамо»-и ВКД дар вилояти Суғд назорат ва бо гузаштани зиёда аз 19 дақиқа ғолибони се зинаи ифтихорӣ муайян гардид. 
Ҳамин тавр бо нишондиҳандаҳои хуби варзишӣ нисбат ба дигар иштирокчиёни мусобиқа дар муҳлати 19 дақиқаю 40 сония лейтенанти калони милитсия Солиев Лутфулло Убайдуллоевич эксперт-криминалисти шуъбаи ташхиси криминалистии Раёсат, дар муҳлати 20 дақиқаю 35 сония майори милитсия Шарифзода Манучеҳр Рустам таҳқиқотчии калони шуъбаи таҳқиқ ва дар муҳлати 22 дақиқаю 38 сония майори милитсия Юсуфзода Саидалӣ Муъмин бозраси давлатии автомобилии ШБДА масофаи пешбинишударо тай намуда ба марра расиданд.
Ғолибони мусобиқа дар рафти чорабинии тантанавии идона ба муносибати Рӯзи милитсия қадршиносӣ мешаванд.
Акбар Шарифӣ, подполковники милитсия