Дар Раёсати ВКД дар вилояти Суғд бо дастури сардори Раёсати мазкур полковники милитсия Пирзода Маҳмадсафар Қузратулло ба муносибати 33-юмин солгарди ҷашни Рӯзи Истиқлоли давлатӣ ба мусобиқаи даставии футбол оғоз бахшиданд. Ҳадафи чорабинӣ солимгардонӣ ва ҷалби ҳайати шахсӣ ба варзиш, тарғиби тарзи ҳаёти солим ва рушду оммавияти ин намуди варзиш дар байни шуъбаву хадамот ва ҷузъу томҳои мақомоти корҳои дохилӣ мебошад, ки барои дарёфти «Ҷоми сардори Раёсати ВКД дар вилояти Суғд» байни ҳам сабқат менамоянд.
Кумитаи тадорукоти чорабинӣ маълумот медиҳад, ки  дар мусобиқа 17 даста дар чаҳор зергурӯҳ байни ҳам сабқат хоҳанд кард ва то санаи баргузории чорабиниҳо ба истиқболи Рӯзи Истиқлоли давлатии Ҷумҳурии Тоҷикистон нерӯсанҷии дастаҳо ҷараён гирифта ғолибон дар арафаи ин ҷашнвораи умумимиллӣ қадршиносӣ мешаванд. 
Мусобиқа дар варзишгоҳи «Спартак»-и шаҳри Хуҷанд бо ҷалби мураббиёни ин соҳаи варзиш аз рӯи системаи даврӣ гузаронида мешавад. Ҳамзамон масъулини шуъбаи кадрҳо ва кор бо ҳайати шахсии Раёсати ВКД дар вилояти Суғд ва Шӯрои ҷумҳуриявии «Динамо»-и ВКД дар вилояти Суғд ҷиҳати  ташкили сифатнокии мусобиқа вазифадор шудаанд. 
Ҳамарӯза баъди соати корӣ ташкили ду бозӣ дар назар аст.
Гуфтан ба маврид аст, ки варзиш дар реҷаи кории мақомоти корҳои дохилӣ мавқеъи хос дорад. Зеро корманди руҳану ҷисман обутобёфта дар иҷрои рисолати касбӣ низ муваффақ аст.
Рафти мусобиқа нишон хоҳад дод, ки кадом даста бағайр аз иҷрои уҳдадории хизматӣ ҳамзамон дар риштаи варзиши намуди футбол низ маҳорати хуб дорад.
Аз натиҷаи мусобиқаи варзишӣ иловатан маълумот хоҳем дод.
Акбар Шарифӣ, подполковники милитсия