Тибқи дастуру супоришҳои Вазири корҳои дохилии Ҷумҳурии Тоҷикистон генерал-полковники милитсия Раҳимзода Рамазон Ҳамро бо мақсади баланд бардоштани ҳамкориҳо дар самти вусъат ёфтани мавқеи зан дар ҷомеа бо намояндагони Дафтари барномавии САҲА дар ш.Душанбе вохӯрии судманд ташкил ва баргузор карда шуд. 
Дар вохӯрӣ Ҳамоҳангсози миллӣ оид ба ислоҳоти милитсия генерал-майори милитсия Азизулозола Сафиало Азизуло, намояндагони Дафтари барномавии САҲА дар шаҳри Душанбе, афсари алоқа оид ба ислоҳоти милитсия Маҳмадиев Ҳайдар Холович, мушовирони миллӣ оид ба масъалаҳои пешгирии зуроварӣ дар оила ва иштироки занон дар сиёсат Манижа Тилавова ва Ригина Соколова иштирок намуданд.
Дар ҷараёни вохӯрӣ ҷонибҳо вобаста ба масъалаҳои баланд бардоштани ҳамкориҳои судманд бо Шуроҳои занони Вазорати корҳои дохилӣ ва ташкили чорабиниҳои мақсаднок бо кормандзанони мақомоти корҳои дохилӣ мубодилаи афкор намуданд.
Дар анҷоми вохӯрӣ баҳри тақвият ёфтани ҳамкориҳои судманд ва иҷрои барномаҳои миллӣ оид ба баланд бардоштани мавқеи зан дар ҷомеа пешниҳодҳои мушаххас сурат гирифт.
Таъкид гардид, ки имрӯз кормандзанони мақомоти корҳои дохилӣ  сипари боэътимод дар низоми мақомоти ҳифзи ҳуқуқ ба ҳисоб рафта, дар баробари ҷавонмардон баҳри ободии кишвари азизамон Тоҷикистон ва пойдориву устувории сулҳу субот софдилонаву содиқона хизмат менамоянд.
Ҷонибҳо аз ташкил гардидани вохӯрии судманд изҳори хушнудӣ намуда, иброз доштанд, ки ҳамкориҳои Вазорати корҳои дохилӣ ва Дафтари барномавии САҲА дар шаҳри Душанбе дар самтҳои зикргардида дар оянда боз ҳам густариш хоҳад ёфт.
Гул Маҳбуба, Фаррух Самадзода